Carlos Pujol

Carlos Pujol Jaumandreu (Bartzelona, 1936- ''ibidem'', 2012ko urtarrilaren 16a) katalan idazlea eta itzultzailea izan zen.

Poeta, eleberrigilea, saiakeragilea, itzultzailea, literatura-kritikaria eta literatura-irakaslea izan zen. Genero guztiak landu zituen, eta letren munduari buruzko alderdi guztiez arduratu zen. ''Planeta'' argitaletxean egindako lanagatik nabarmendu zen, batez ere. Aldi berean, eleberriak, aforismo-bildumak, saiakerak, eta literatura-kritikako artikulu asko idatzi zituen, ingeles eta frantses idazleen itzulpenak egiteaz gainera. Hori guztia, baina, bigarren mailan geratu zen poesia argitaratzen hasi zenetik, 1980ko hamarraldiaren bukaeran. Izan ere, 1987an, urteetako lan apal eta isilaren ondorioz, poema-liburu bat argitaratu zuen, arrakasta handikoa: ''Gian Lorenzo'' (1987), bertso alexandrotarretan idatzitako kontakizuna. Zazpi urte geroago argitaratu zuen bigarrena, ''Desvaríos de la edad'' (1994), aurrekoaren perfekzio formal berarekin. 1998an ''haiku'' bilduma bat argitaratu zuen: ''Hai-kais del abanico japonés''. Urte berean aforismo eta artikulu laburren bilduma bat argitaratu zuen, ''Tarea de escribir''; era askotako gaiak landu zituen liburu horretan: literatura-arrakastaren arrazoiak, gustuaren sena, idazteko askatasuna, idazle gazteak, zenbait idazleren pedanteria eta abar. Beste lan aipagarri batzuk: ''Vidas de poetas'' (1995); ''Los aventureros ''(1996); ''Conversación'' (1998). Wikipediatik informazioa lortu